قدو

حدو

لابس سروال

بلا صدايف

رابطو بشريط

فرجلو نعالة

تنعل الطريق ..

حدو

قدو

ما عندو حد

ما عندو سعد

مفرش كارطون

كبر منو

موسد مخدة

صغر منو

هو يجبد

هي تجبد

وما شافو حد ...

حدو

شاف على راسو

شاف بالمومو

بدفال قلامو

كتب كلامو

بالضيطاي

كتب حلامو

بالطاي طاي

وكال : الوقت خامجة

رمانة مكيحة

والميزان طاح

فيد عوجة

وديرها فين تجيه ...

حدو بالة

لابس دربالة

فمو سؤال

ديما واجد

يسرح

بلا كسيبة

ويغني بلاد السيبة :

السيبة دجاجة

تبيض فلوس لحرام

السيبة ذبانة

فرحانة بزبالة ...

حدو

فصيح وصريح

ثاقب سوارو

لسانو ماضي

حافظ سوارو

عينو تعطب

عينو تجذب ...

قدو

حدو

فران وقاد ببلاد

إيفيق بكري

وما يتباع بذهب

يشعل العافية

بقلبو طول النهار

يعجن خبار لحومة

يفضح سرار لحكومة

ما يطيب ليه نعاس

حتى يطير ليه ...

شدك دلخبز حافي

كافيه

وكاس دتاي بارد

حدو ديما شارد

شاد العسة

شاد خيوط القصة

لا تهرب من يديه

وطير ليه لفرخ ...

قدام زبالة

ورا زبالة

داير دارو

كرطونة كبر منو

مخدة صغر منو

هو يجبد

هي تجبد

من زمان ...

ولمقدم ما جاب خبار

الحاكم غايب عن الدار

كيف ديما مسافر فنزاهة

كالو مسمار هنا

وخشب مصدي لهيه ...

واحد نهار

من سعدو

حدو

دازت كروسة دعروسة

تابعها لعيط

دازت كروسة دلبانان

تابعها لغيط

وكلاها بعينيه

عينو تعطب

عينو تغضب ..

دازت فوق رجليه

نملة كحلة

باسها فعنيها

وكال ليها :

الله يسهل ما صعاب ...

واحد نهار

حدو

ركب خيالو

وحلف بيمانو

ما ينزل

حتى يطلع النهار ...